RELATOS DE MEDO POLO SAMAÍN

 Boas a tod@s! 

Vimos desta volta cunha proposta de cara ao Samaín... para alumnado, profesorado e familias!! 

Rebuscade nos vosos medos, nesas historias que fan tremer dende a punta do dedo gordo do pé ata a do pelo máis longo da cabeza... poñédevos creativ@s e... A ESCRIBIR!

Agardamos os vosos relatos, que poden vir decorados do xeito máis fantasmagórico posible, cos que faremos unha presentación recopilatoria que publicaremos no blogue. 

Para iso, facédelle unha foto ben clariña, na que se vexa ben a vosa presentación e enviádea ao correo bibliooutes@gmail.com 

DATA LÍMITE PARA O ENVÍO DOS RELATOS: MARTES 27 DE OUTUBRO Á MEDIANOITE!

Animádevos! Agardamos os vosos relatos!

RECURSOS

Aproveitamos tamén para deixarvos uns recursos 

que podedes pedirlle ao profesorado para que os leven á aula!

Contos para tremer de medo a disposición na Biblioteca para que collan os mestres e mestras...

Premede na imaxe para acceder ao taboleiro e poder ver cales son os fondos dispoñibles.

E curtas das que quitan a respiración...

Premede na imaxe para acceder ao taboleiro cos enlaces directos ás curtas.

Homenaxe a Quino a través de Mafalda

 

Esta fin de semana recibimos a triste noticia do pasamento do debuxante Quino. 

Creador de Mafalda, esa marabillosa personaxe feminista, pacifista e crítica co mundo dos adultos. Unha incansable pensadora que espertou a simpatía de todo o mundo, dando leccións en cada viñeta, sempre dende o humor intelixente e a crítica social. 

Como non cremos que poida haber mellor homenaxe para un debuxante que ler e reler as súas historias, deixámosvos este fantástico documento no que ademais de presentarnos ás personaxes dos álbums de Mafalda, nos permite acceder aos mesmos para a súa lectura pinchando nos libros das estanterías. 

Premede na imaxe para acceder ao documento, 

despois pinchade en algún dos libros da portada

 e a desfrutar das ocurrencias da marabillosa Mafalda. 

*QUEDARAVOS TAMÉN NA PÁXINA DE BIBLIOTECAS VIRTUAIS, DEBAIXO DA CABECEIRA, 

ONDE PODEREDES ATOPAR ESTAS E OUTRAS LECTURAS DAS QUE ESPERAMOS DEDES BOA CONTA ;)

Boa viaxe Quino!

BENVID@S A ESTE NOVO CURSO!

Iniciamos un curso ilusionante tras 6 meses de non vernos. Un curso extrano no que teremos que intentar dar o mellor de nós mesm@s. Pero tamén un curso histórico que o será moito máis por todo o que conseguiremos! 

O espazo físico da Biblio e o Tecnolab, inaugurado o ano pasado, permanecerán pechados de momento. Pero iso non quere dicir en absoluto que a biblio peche. A biblio formámola as persoas e o conxunto de actividades que levaremos a cabo xunt@s. Así que preparádevos e...

EN BREVE COMEZAMOS!!

Ilustración de Georgiana Chitac

Lecturas de corentena III

Nesta ocasión a profe Patri lenos un anaquiño do conto: De maior quero ser... A súa autora é Ana Belén González. Atentos, que empeza!

Lecturas de corentena II

Alba,da clase de 6º, lenos un conto de bruxas que ela mesma escribiu. Está feita unha artista!

Lecturas de corentena

O profe Adrián lenos un anaco dun dos seus libros favoritos, Pippi Mediaslongas; da autora Astrid Lindgren. Agardamos que vos  guste!

Semana da poesía

Para celebrar a semana da poesía organizouse unha actividade, na que en grupos interniveis  o alumnado traballou con   versos de diferentes poemas e  de diversa autoría todos co tema da igualdade. Con estes versos, os grupos crearon novos poemas, que despois recitaron para o resto do alumnado. 

Día da muller traballadora

Para conmemorar o día da muller traballadora  fixemos unha exposición de fotografías de mulleres da comunidade educativa traballando (presentes ou pasadas). Decoramos a exposición ca temática do mar, aparellos de pesca e barcos de papel violeta; xa que éste está moi presente na vida das mulleres  polas características da contorna. Quedou moi fermosa!

Club de lectura: 2º trimestre

No segundo trimestre lemos "Correo Urxente" de Paula Carballeira e "O Misterio do Torque de Burela", de Antía Yáñez.

Paula Carballeira (Fene, 1972) é licenciada en Filoloxía Hispánica; dedícase profesionalmente ao teatro e á narración oral. Participa en diversos programas da TVG e ten colaborado como locutora na Radio Galega. Como autora de literatura infantil publicou as seguintes obras: A percura (1990); Robín e a boa xente (1995); Troulas, andainas, solpores e unha farsa anónima (1996); Olo-iepu-iepu (1999); Mateo (1999); Un porco e unha vaca xa fan zoolóxico (Xerais 1999); Paco (2001); Correo urxente (2001); O ganso pardo (2002); A era de Lázaro (2004); Smara (2006); Boas noites (Xerais 2007), Premio Manuel María de Literatura Dramática Infantil 2007 e O refugallo (Xerais 2013), Premio Manuel María de Literatura Dramática Infantil 2011. Ten publicado, ademais, o poemario Contatrás (2006).

Sinopse: Milio é un bo cociñeiro. E coñece moitas historias divertidas, historias que lles conta á súa irmá e aos nenos e ás nenas. Porque Milio é o cociñeiro dun colexio.

Antía Yáñez (Burela, 1991) é enxeñeira de Camiños, aínda que nunca exerceu a profesión. Entre os premios outorgados á súa obra atópanse o Certame de Microrrelatos "Lonxa Literaria" 2013, de Moaña, o Premio de Relatos Curtos “Os Viadutos” 2014, de Redondela, e o Certame Literario de Poesía e Narración Breve de Cambre (2016). Actualmente compaxina a escrita coa xestión dunha academia en Cecebre (Cambre), onde imparte obradoiros de escritura para rapazas e rapaces. O misterio de Portomarín é a súa primeira novela.

Sinopse: Son milleiros de rapazas e rapaces os que coñecen estes catro irmáns e un can especialista en investigar misterios inquedantes. Percorren Galicia vivindo aventuras e descubrindo asasinatos e roubos. Son infalibles. Nesta nova hisoria, demóstrano unha vez máis…

Día de Rosalía

Para celebrar o día de Rosalía de Castro, 24 de febreiro, repartíronse uns poemas  a modo de pergamiño e co que envolvemos caraveis, que se deixaron nas aulas para darlle unha sorpresa ó alumnado.  Tamén se repartiron chapas conmemorativas deste día.

Tecnolab

Este curso temos un novo espazo no centro, un laboratorio, espazo creativo, de construcción, lóxico-matemático... 

Na aula podemos atopar material de laboratorio e xogos de enxeñería, construción, lóxica e resolución de problemas para crear un espazo científico e creativo.

Un grupo de voluntari@s axudou a preparar este espazo para que todos e todas poidamos desfrutalo. 

Podes usar este espazo nos recreos; pero debes coller o teu carnet na biblioteca para poder entrar, xa que hai un número  máximo de usuarios. Debes atender as normas de uso deste espazo e devolver o carnet a biblio cando termine o recreo. Si tes dúbidas de como usar o material, poderánche asesorar os axudantes de biblioteca. 

DÍA DA PAZ

Durante os últimos días estivemos facendo nas aulas unha escultura con caixas, a que chanmamos “IGUALDADE COMO FERRAMENTA PARA A PAZ”. É unha obra reivindicativa na que se reflexan numerosas mostras de discriminación e violencia sufridas polas mulleres nos distintos eidos artísticos.

Proxecto: As mulleres na arte

Este curso vamos a levar a cabo un proxecto para reivindicar o papel das olvidadas ou pouco recoñecidas nos distintos eidos artísticos ao longo da historia.

Nove disciplinas artísticas a avaliar e nas que reivindicar o papel das mulleres.

 ESCULTURA

 LITERATURA (Narrativa e poesía)

 ARQUITECTURA

 ARTES ESCÉNICAS (Teatro e danza)

 ARTES VISUAIS (Pintura)

 CINEMATOGRAFÍA

 CÓMIC

 MÚSICA

 FOTOGRAFÍA